# 24: උසාවියක් දෙවෙනි කළ ශිෂ්‍යත්ව ප්‍රතිඵලය

පෝරුවෙදි  පෙමින් බැඳී  - සුදු පාට සේල පට

යහන මත එළුව දා - වරිග හැම සතුටු කළ

වාසගම වෙනස් කොට - මට මාව අහිමි කළ

කුල ගෙයක උදානය - රෙදි කඩක සැඟව ඇත

කඳුළු වැසි පිසින්නට - නෙරි පොටත් මිදුව සඳ

ඔබේ යහන බදුගත්ත - මියුලැසියෝ රැසක් මැද

ඔබේ පයට පෑගිලා - කළුම කළු පැහැ  ගත්ත

රතු පාට සුදු රෙද්ද - අපුල්ලනු කවුරුන්ද?

හය වසක් මෙපුර දන - උසාවියේ පිරි මැද්ද

මගේ ඒ සුදු රෙද්ද - මටම අරුමයක් වෙද

පැමිණිල්ලේ වාසියට - උසාවිය තිලිණ  කළ

මගේ කන්‍යා නමට - නාවලා ගෙට ගයිද?

සිතුවාට උඹ ඉතින - පරසිඳුය තෙද බලය

උසාවියේ තීන්දුව - බල්ලොවත් තැකුවාද

ශිෂ්‍යත්ව ප්‍රතිඵලය - දනන් තුඩ රැඳුනු සඳ

මගේ දුව සේදුවා - සුදු රෙද්දේ බොර පැහැය